იმისათვის, რომ საქართველოში რეგისტრირებულმა იურიდიულმა პირმა მიიღოს საჰაერო გადაყვანა-გადაზიდვის მოწმობა, მან უნდა დააკმაყოფილოს შემდეგი ძირითადი მოთხოვნები:

• საქმიანობის ადგილი (Principal Place of Business) – მოწმობის მაძიებლის საქმიანობის ძირითადი ადგილი უნდა იყოს საქართველო. საქმიანობის ძირითად ადგილში მოიაზრება საწარმოს ძირითადი ადგილსამყოფელი, სადაც ხორციელდება ძირითადი საფინანსო ოპერაციები, ოპერირების დაგეგმვა და ფრენის ვარგისობის შენარჩუნების მართვა;

• უპირატესი საკუთრება და ეფექტური კონტროლი (Ownership and Effective Control) – მოწმობის მაძიებელ იურიდიულ პირს უნდა ფლობდეს /ფლობდნენ საქართველოს მოქალაქე(ები), თავად საქართველოს სახელმწიფო, სახელმწიფო საკუთრების ფორმით, ან საქართველოში რეგისტრირებული იურიდიული პირი. ამასთან, აუცილებელი მოთხოვნაა, რომ ზემოაღნიშნული მესაკუთრეები საწარმოში საკუთრების უფლებით ფლობდნენ კაპიტალში ხმის უფლების მქონე წილების ან აქციების 50%-ზე მეტს (უპირატესი საკუთრების მოთხოვნა) და საწარმოს საკონტროლო პაკეტის ფლობასთან ერთად, ეფექტურად მართავდნენ საწარმოს (ეფექტური კონტროლი);

• საჰაერო ხომალდის ექსპლუატანტის სერტიფიკატი (AOC) – მოწმობა არ გაიცემა, თუ კომპანია უკვე არ ფლობს საჰაერო ხომალდის ექსპლუატანტის მოქმედ სერტიფიკატს, რომელიც ადასტურებს ოპერატორის მიერ ფრენების უსაფრთხოდ შესრულების შესაძლებლობას.

• ფინანსური მდგრადობა – კომპანიამ უნდა დაამტკიცოს, რომ შეუძლია პირველი 24 თვის განმავლობაში შეასრულოს ვალდებულებები და პირველი 3 თვის განმავლობაში დაფაროს ფიქსირებული და საოპერაციო ხარჯები ოპერირებიდან მიღებული შემოსავლის მიღების გარეშე;

• დაზღვევა: სავალდებულოა მგზავრების, ბარგის, ტვირთისა და მესამე პირების წინაშე პასუხისმგებლობის დაზღვევა საერთაშორისო ნორმების შესაბამისად.

• კარგი რეპუტაცია: სავალდებულოა რომ კომპანიის გადაწყვეტილების მიმღები პირი (პირები) სარგებლობდნენ დადებითი რეპუტაციით.

მოწმობის მაძიებელთა მიმართ დადგენილი დეტალური მოთხოვნები და სააგენტოში წარმოსადგენი დოკუმენტაცია განსაზღვრულია „საჰაერო გადაყვანა-გადაზიდვის მოწმობის გაცემის წესში“, რომელიც ხელმისაწვდომია მოცემულ ბმულზე. ამასთან, ამავე ბმულზე და სააგენტოს სახელმძღვანელო მასალებში შეგიძლიათ გაეცნოთ „საჰაერო გადაყვანა-გადაზიდვის მოწმობის გაცემის მომწესრიგებელი ნორმების განმარტებით სახელმძღვანელოს“,  რომელიც საჰაერო გადაყვანა-გადაზიდვების მოწმობის მაძიებელ საწარმოებს, ინვესტორებს, არსებულ ავიაგადამზიდველებსა და სხვა დაინტერესებულ პირებს დაეხმარებათ წესით გათვალისწინებული ნორმების, არსებული თუ პოტენციური ვალდებულებების უკეთ გაგებაში.